سپریم کورٹ نے نجی پاور کمپنی رشما پاور پلانٹ کے ذمہ ساڑھے چار ارب روپے اٹھارہ نومبر تک ادا کرنے کا حکم دیا ہے۔

عدالت کا کہنا تھا کہ چونکہ یہ رقم امریکی ڈالرز میں ادا کی گئی تھی اس لیے اس کو اُسی کرنسی میں ہی واپس کیا جائے اور اس پر سُود بھی ادا کیا جائے۔

حکومت نے ڈھائی سال قبل مذکورہ پاور کمپنی کو اربوں روپے سولہ فیصد مارک اپ پر بینک سے قرضہ لیکر ادا کیے تھے۔

عدالت عظمیٰ نے یہ احکامات کرائے کے بجلی گھروں سے متعلق از خود نوٹس اور اس سلسلے میں دائر مختلف درخواستوں کی سماعت کے دوران دیے۔

چیف جسٹس افتخار محمد چوہدری کی سربراہی میں سپریم کورٹ کے دو رکنی بینچ نے ان درخواستوں کی سماعت کی۔

عدالت کا کہنا تھا کہ رشما پاور کمپنی معاہدے کے مطابق کام کرنے میں ناکام رہی ہے۔

مذکورہ پاور کمپنی کے وکیل کا کہنا تھا کہ اُن کے مؤکل نے ڈھائی ارب روپے ادا کردیے ہیں جس پر بینچ میں شامل جسٹس خلجی عارف حسین نے کہا کہ ساڑھے چار ارب روپے بطور ایڈوانس دیے گیے تھے اور اس پر مارک اپ بھی بنتا ہے۔

اُنہوں نے کہا کہ حیرت ہے کہ رشما کمپنی کو ڈھائی سال پہلے رقم ایڈوانس میں دی گئی تھی لیکن کسی نے بھی اس کمپنی سے پوچھنے کی جسارت نہیں کی کہ وہ ابھی تک بجلی پیدا کیوں نہیں کر رہی۔

چیف جسٹس نے ریمارکس دیتے ہوئے کہا کہ نیپرا جو ایک قومی ادارہ ہے اُس کے وکیل نے بھی اس بات کی نشاندہی کی ہے کہ کرائے کے بجلی گھروں کے معاہدوں میں قواعد و ضوابط کی خلاف ورزی کی گئی ہے۔ اُنہوں نے کہا کہ حکومتی ادارے نیپرا کی طرف سے متعلقہ حکام سے کہا گیا تھا کہ وہ ان معاہدوں پر نظر ثانی کریں لیکن ایسا نہیں کیا گیا۔

مارکیٹ میں آنے کے چند ہفتوں میں ہی ایپل کمپنی کے جدید موبائل فون آئی فون فور ایس کو کمزور بیٹری پر تنقید کا سامنا ہے۔

ہزاروں صارفین نے فور ایس کی کم بیٹری لائف کی شکایت کی ہے اور خاص طور پر اُن لوگوں کے آئی فون کے مسائل بڑھ گئے جنہوں نے آئی او ایس فائیو کے ساتھ فور ایس کا سافٹ وئیر اپ گریڈ کیا ہے۔

ایپل کمپنی نے کہا کہ وہ اِس مسئلے پر تبصرہ کرنے سے قاصر ہے۔

آئی فون فور ایس کی بغیر کسی استعمال کے بیٹری لائف دو سو گھنٹے بتائی گئی تھی لیکن بعض صارفین نے شکایت کی ہے کہ اُن کے آئی فون کی بیٹری پندرہ فیصد فی گھنٹہ کی رفتار سے ختم ہوتی ہے۔

ایپل کمپنی کے فورمز پر آئی فون فور ایس کی بیٹری کے مسئلے پر بھرپور مباحثے جاری ہیں اور ایک بلاگر نے لکھا کہ اُن کے فون کی بیٹری کا مسئلہ اس وقت ختم ہوا جب انہوں نے آٹو میٹک ٹائم زون سیٹنگ کو بند کر دیا کیونکہ بقول اُن کے’ آئی فون فور ایس کا آپریٹنگ سسٹم ہر وقت ٹائم کو درست کرنے میں لگا رہتا ہے جس کی وجہ سے بیٹری کی چارجنگ جلد ختم ہو جاتی ہے۔‘