بین الاقوامی مالیاتی فنڈ یعنی آئی ایم ایف نے خبردار کیا ہے کہ عالمی معیشت ایک نئے خطرناک دور میں داخل ہو گئی ہے۔

تنظیم نے اپنی تازہ رپورٹ میں خبردار کیا ہے کہ امریکہ اور يورو زون میں مسلسل بڑھتے ہوئے سیاسی اور اقتصادی خدشات کی وجہ سے ایک مرتبہ پھر کساد بازاری کے حالات پیدا ہو سکتے ہیں اور اگر ایسا ہوا تو دنیا کی دیگر معیشتیں بھی اس سے بری طرح متاثر ہوں گی۔

یہ رپورٹ ایک ایسے وقت میں سامنے آئی ہے جب کریڈٹ ریٹنگ ایجنسی اسٹینڈرڈ اینڈ پوئرز نے یورو زون کی تیسری بڑی معیشت اٹلی کی ریٹنگ میں کمی کر دی ہے۔

اس سے قبل پیر کو آئی ایم ایف نے یونان کو متنبہ کیا تھا کہ وہ معاہدے کے مطابق اصلاحات نافذ کرے اور اگر ایسا نہ کیا گیا تو اسے اکتوبر کے لیے مقررہ آٹھ ارب یورو کی امدادی قسط نہیں دی جائے گی۔

آئی ایم ایف کا کہنا ہے کہ دنیا کی ترقی یافتہ معیشتوں نے موجودہ حالات سے نکلنے کی جو کوششیں کی ہیں وہ دیرپا ثابت نہیں ہو سکی ہیں۔

آئی ایم ایف کے مطابق سنہ دو ہزار گیارہ میں دنیا کی ترقی یافتہ معیشتوں میں صرف جرمنی اور کینیڈا ہی ایسے ملک ہیں جہاں ترقی کی شرح دو فیصد سے زیادہ رہےگی اور سنہ دو ہزار بارہ میں جاپان کے علاوہ کسی اور ملک میں ترقی کی شرح مطلوبہ معیار کے مطابق نہیں ہو گی۔

بدھ کے روز امریکی معیشت کے بارے میں منظر عام پر آنے والی رپورٹوں سے ظاہر ہوا ہے کہ روزگار کی صورت حال میں مزید خرابی آئی ہے اور کاروباروں کے افزائش کی رفتار بھی سست ہوئی ہےجب کہ صنعتوں کو ملنے والے آرڈرز میں اضافہ ہواہے۔

جولائی میں ٹرانسپورٹ سے متعلق آلات کی مانگ میں اضافے کے پیش نظر جو توقع کی جارہی تھی، اگست میں ملنے والے آرڈرز کی تعداد اس سے کہیں زیادہ رہی۔

محکمہ تجارت کے اعدادوشمار سے ظاہر ہوا ہے کہ فیکٹریوں کو ملنے والے آرڈرز میں 2.4 فی صد اضافہ ہوا جو اس سے ایک ماہ قبل کے مقابلے میں ایک نمایاں تبدیلی کی سمت اشارہ ہے ، جس میں آرڈرز کی تعداد میں کمی واقع ہوئی تھی۔

ایک کاروباری تحقیقی گروپ کی جانب سے جاری کردہ رپورٹ میں بتایا گیا ہے کہ اگست میں امریکہ  میں کاروباری سرگرمیوں میں اضافے کا رجحان جاری رہا، لیکن یہ رفتار جولائی کے مقابلے میں کم تھی۔

ایک اورادارے اے ڈی پی کا کہناہے کہ اگست کے مہینے میں 91 ہزار نئی ملازمتیں پیدا ہوئیں ، جب کہ یہ تعداد جولائی کے مقابلے میں کم تھی۔

میڈیا کی جانب سے کرائے جانے والی جائزوں کی بنیاد پر ماہرین کاکہناہے کہ اگست میں سرکاری اور پرائیویٹ شعبوں میں ملازمتوں میں حقیقی اضافہ 70 ہزار ہے۔