ہر سال بالی وڈ میں ایوارڈ کی کئی تقریبات ہوتی ہیں اور کئی بار ان تقریبات میں دیے جانے والے ایوارڈ پر سوال اٹھتے ہیں۔ حال ہی میں دیے گئے سال دو ہزار گیارہ کے لیے سکرین ایوارڈ پر بھی سوالیہ نشان لگ رہے ہیں۔

سال کی دو سب سے کامیاب فلمیں دینے کے بعد بھی اگر کسی اداکار کو کسی ایوارڈ کی تقریب میں ایوارڈ ملنا تو دور کی بات اگر نامزدگی بھی نہ ملے تو یہ بات ذرا عجیب سی لگتی ہے۔

بات ہو رہی ہے سلمان خان کی۔ سلمان نے سنہ دو ہزار گیارہ میں پہلے ’ریڈي‘ اور پھر ’باڈی گارڈ‘ جیسی بلاك بسٹر فلمیں دیں لیکن اس کے باوجود انہیں سکرین ایوارڈ میں کوئی نامزدگی تک نہیں ملی۔

سلمان خان کو سکرین ایوارڈ میں کوئی بھی نامزدگی نہ ملنے سے صرف میڈیا ہی نہیں بلکہ خود بالی وڈ بھی حیران ہے۔ حال ہی میں ممبئی میں یہ ایوارڈ دیے گئے۔

اداکارہ پریانکا چوپڑا کہتی ہیں ’مجھے تو یقین ہی نہیں ہو رہا کہ سلمان خان کو ان ایوارڈ میں کوئی نامزدگی تک نہیں ملی۔ مجھے ایسی امید بالکل نہیں تھی۔ میرے خیال میں تو سلمان کو باڈی گارڈ کے لیے ضرور نامزد کیا جانا چاہیے تھا۔‘

جب یہ ہی سوال صحافیوں نے فلمساز کرن جوہر سے پوچھا تو گول مول جواب دیتے ہوئے وہ بولے ’آپ یہ سوال سکرین سے ہی کیوں نہیں پوچھ لیتے۔ یہ ان کا فیصلہ ہے، میں اس بارے میں کچھ نہیں جانتا۔ میں تو جیوری کا حصہ بھی نہیں تھا۔‘

دیپیکا پڈوکون بھی اس بات پر حیران تھیں کہ سلمان خان کو سکرین ایوارڈ کے کسی بھی زمرے میں کوئی بھی نامزدگی نہیں ملی۔

اداکارہ جوہی چاولہ نے بھی سلمان کے نامزد نہ ہونے پر حیرانی کا اظہار کرتے ہوئے کہا ’ذرا آپ ہی پوچھیے کہ سلمان کو کیوں نامزد نہیں کیا گیا۔ میں تو کہتی ہوں میری فلم ’آئی ایم‘ کو بھی نامزدگی ملنی چاہیے تھی، وہ بہت اچھی فلم تھی۔ کم سے کم نقادوں کی فہرست میں تو اس فلم کو ہونا ہی چاہیے تھا۔‘

سکرین ایوارڈ کی جیوری میں اس بار ہدایت كار کنال کوہلی بھی شامل تھے۔ جب صحافیوں نے كنال سے سلمان خان کے بارے میں سوال کیا تو وہ بولے ’بالکل صحیح بات ہے کہ اس بار سکرین پر سلمان خان کو کوئی نامزدگی نہیں ملی لیکن جیوری میں میرے علاوہ سات لوگ اور تھے۔ ان سب سے پوچھیے کہ سلمان کو نامزد کیوں نہیں کیا گیا۔

سکرین ایوارڈ میں اپنی فلم ’دی ڈرٹی پکچر‘ کے لیے کئی ایوارڈ جیتنے والے ڈائریکٹر ملن لوتھريا نے کہا ’آج کی تاریخ میں ہماری انڈسٹری میں کئی ایوارڈ دیے جانے لگے ہیں۔ ہر جیوری کا نظریہ مختلف ہے۔ کبھی کسی تقریب میں کچھ فلمیں زیادہ ایوارڈ لے جاتی ہیں تو کسی تقریب میں کوئی اور فلم۔ جہاں تک سلمان خان کی بات ہے انہوں نے تو سب سے بڑا ایوارڈ اپنے نام کیا ہے اس سال انہوں نے دو بار باکس آفس پر کمال کیا اور میرے خیال سے اس سے زیادہ خوشی کی بات ان کے لیے ہو ہی نہیں سکتی۔‘

سکرین ایوارڈ میں شامل اداکارہ ماہی گل نے سلمان خان کی تعریف کرتے ہوئے کہا ’وہ تو ویسے ہی سپر اسٹار ہیں ان کو کسی نامزدگی کی کوئی ضرورت نہیں ہے‘۔ ماہی کی ہاں میں ہاں ملائی پاکستانی اداکار علی ظفر نے۔ ان کا کہنا تھا کہ سلمان خان کسی بھی نامزدگی یا انعام سے بہت بلند ہیں۔